Policia e Tiranës ka goditur dy raste të trafikimit ndërkombëtar të kanabisit me përqindje të lartë THC, të ardhur nga SHBA përmes postës. Si rezultat i operacioneve të koduara “Pako 1” dhe “Pako 2”, u arrestuan tre persona, ndërsa dy të tjerë janë shpallur në kërkim.
Operacionet janë zhvilluar pas një hetimi të thelluar disamujor me metoda proaktive, në bashkëpunim me disa struktura të Policisë së Shtetit, përfshirë Forcën e Posaçme Operacionale dhe Komisariatin e Policisë Rinas.
“Pako 1” – Në Tiranë, shtetasit A.P., 24 vjeç dhe A.Xh., 55 vjeç, u kapën në flagrancë teksa merrnin një pako me 522 gramë kanabis me përqindje të lartë THC. Hetimet zbuluan se porositësi ishte shtetasi B.F., 25 vjeç, i cili ndodhet në kërkim.
“Pako 2” – Në Shkodër, u arrestua M.H., 19 vjeç, pasi mori në një degë postare një pako me rreth 1.07 kg kanabis, gjithashtu me origjinë nga SHBA. Porositësi i kësaj pakoje, G.P., 23 vjeç, është gjithashtu në kërkim.
Policia deklaron se vijojnë hetimet për të identifikuar personat e tjerë të përfshirë në rrjetin e trafikimit dhe për të çuar përpara drejtësisë të gjithë të implikuarit.