Gjykata e Apelit në Bolonjë ka dhënë katër burgime të përjetshme për familjarët e Saman Abbas, vajzës pakistaneze të vrarë në Itali në vitin 2021, në moshën 18-vjeçare pasi kundërshtoi një martesë të detyruar me kushëririn e saj.
Prindërit e saj, Shabbar Abbas dhe Nazia Shaheen, si dhe dy kushërinjtë Noman Ulhaq dhe Ikram Ijaz, u dënuan me burg të përjetshëm. Xhaxhai i saj, Danish Hasnain – i cili zbuloi vendndodhjen e trupit – u dënua me 22 vite burg.
Saman u vra pasi refuzoi të jetonte sipas rregullave tradicionale të familjes. Ajo kërkonte liri, dashuri dhe një jetë si çdo vajzë tjetër në Perëndim. Trupi i saj u gjet një vit më pas, i varrosur në një kasolle afër shtëpisë familjare në Novellara.
Vendimi historik vjen pasi të gjithë të akuzuarit mohuan përfshirjen dhe fajësuan njëri-tjetrin. Gjykata njohu rrethanat rënduese si paramendimi dhe motivet e dobëta.