Profesori italian Michele D’Angelo, nga qyteti L’Aquila, i ndodhur prej rreth 50 ditësh në paraburgim në burgun e Fierit pas një aksidenti rrugor më 8 gusht, ka përcjellë një mesazh prekës përmes bashkëshortes së tij, Vanessa Castelli, e cila e vizitoi sot në qeli.
Në mesazhin e shpërndarë nga familjarët, profesori shpreh mirënjohjen ndaj të gjithë atyre që e kanë mbështetur publikisht dhe kërkon që rasti i tij të trajtohet me qartësi dhe drejtësi.
“Po jetoj këto ditë me një ndjenjë të thellë mirënjohjeje ndaj atyre që më mbështesin dhe shprehin atë që ka ndodhur, në mënyrë që të krijohet qartësi,” shprehet ai.
D’Angelo e cilëson masën e paraburgimit si të tepruar dhe thekson vështirësitë e mëdha që përballet si i huaj në një vend ku nuk njeh gjuhën.
“Nuk mund ta mohoj se masa e paraburgimit në burg është, sipas mendimit tim, e tepruar. Është një gjendje jashtëzakonisht e vështirë, e bërë edhe më e vështirë nga fakti që jam larg shtëpisë, në një vend gjuhën e të cilit nuk e flas,” shkruan ai.
Ai apelon për përdorimin e masave alternative, duke marrë në konsideratë sjelljen e tij, historinë personale dhe profesionale, si dhe gjendjen shëndetësore:
“Shpresoj që ky reflektim të pritet me kujdes. Nuk po kërkoj privilegje, por proporcionalitet.”
Me gjithë situatën e vështirë, profesori italian thekson se i beson institucioneve shqiptare dhe aftësisë së tyre për të vlerësuar me paanshmëri të gjitha rrethanat.
“Unë i besoj punës së autoriteteve shqiptare dhe aftësisë së tyre për të vlerësuar çdo faktor në mënyrë të paanshme,” përsëriti ai.
Një vend të veçantë në mesazhin e tij zë edhe falënderimi për mbështetjen e marrë nga bashkëshortja, kolegët, studentët dhe komuniteti akademik.
“Mbështetja që po marr nga Vanessa, nga kolegët, nga studentët, nga institucionet është ajo që më mban larg shembjes. Është spiranca ime. Çdo fjalë, çdo gjest, çdo shenjë shqetësimi është si një dritare që hapet.”
Në fund, D’Angelo shpreh qartë qëndrimin e tij:
“Nuk po kërkoj dhembshuri, por të vërtetën. Nuk po kërkoj privilegje, por drejtësi dhe proporcion.”