Një nga personat më të kërkuar në botë, Zhi Dong Zhang, i njohur me disa pseudonime si “Vëllai Wang”, “Pancho” dhe “HeHe”, është arrestuar dhe ekstraduar në Shtetet e Bashkuara, duke i dhënë fund një arratie spektakolare që përfshinte Meksikën, Kubën dhe një tentativë për arratisje drejt Rusisë.
Qeveria kubaneze konfirmoi se kishte ekstraduar Zhang drejt Meksikës, ndërsa shefi i sigurisë meksikane njoftoi më pas se ai ishte dorëzuar autoriteteve amerikane për t’u përballur me akuza për trafik ndërkombëtar droge dhe pastrim parash.
Sipas Departamentit të Drejtësisë të SHBA-së, Zhang konsiderohet një figuri kyçe në tregtinë globale të fentanilit, i cili ka ndërtuar një rrjet ndërkombëtar që lidh kompanitë kimike kineze me kartelet mëksikane të drogës, përfshirë Sinaloa dhe Jalisco New Generation (CJNG). Ai akuzohet për pastrimin e miliona dollarëve për këto organizata përmes kriptomonedhave dhe kanaleve të tjera financiare.
“I ashtuquajturi ‘Vëllai Wang’ ishte hallka që bashkonte botën e karteleve meksikane me kompanitë kineze të kimikateve që prodhojnë fentanilin,” – shpjegon ish-agjenti i DEA-s, Mike Vigil. “Ai luante rol thelbësor në konvertimin e të ardhurave nga droga në kriptovaluta.”
Historia e Zhang ngjan me një skenar filmi. Pas arrestimit në Mexico City, në tetor 2024, ai u mbajt fillimisht në një burg të sigurisë së lartë, por më vonë një gjyqtar i dha arrest shtëpiak – vendim që Presidentja meksikane Claudia Sheinbaum e quajti “skandaloz”.
Nga aty, Zhang u arratis përmes një vrime në mur, hipi në një avion privat drejt Kubës dhe më pas tentoi të udhëtonte drejt Rusisë, përpara se të kapej nga autoritetet kubaneze në Havana.
Me ekstradimin e tij drejt SHBA-së, Zhi Dong Zhang pritet të përballet me një dënim të ngjashëm me bosët e tjerë legjendarë të drogës, si Joaquin “El Chapo” Guzman dhe Ismael “El Mayo” Zambada, në një burg federal të sigurisë maksimale në SHBA.