Një 40-vjeçar nga Lezha, i shpallur në kërkim ndërkombëtar nga autoritetet spanjolle, është arrestuar në Shqipëri si rezultat i një operacioni të koordinuar me INTERPOL-in.
I ndaluari është Gjergj Gjoka, i njohur edhe me identitetet Gjergj Marku, Gjergj Ruqja dhe Gjergi Ruqja, 40 vjeç, lindur në Lezhë. Ai kërkohej nga drejtësia spanjolle për akuzat e pjesëmarrjes në organizatë kriminale, kultivim të bimëve narkotike dhe vjedhje të energjisë elektrike.
Operacioni u zhvillua nga Drejtoria e Forcës së Posaçme Operacionale, në bashkëpunim me partnerët spanjollë dhe Interpol-in, në kuadër të aksionit të koduar “Operacionalja 58”.
Sipas vendimit të Gjykatës së Instruksionit nr. 1 në Castellon de la Plana (Spanjë), në vitin 2025 ndaj tij është caktuar masa e sigurisë “arrest në burg”. Hetimet kanë zbuluar se 40-vjeçari ishte pjesë e një grupi të strukturuar kriminal me role të ndara, që merrej me sigurimin e ambienteve, përshtatjen e tyre për kultivim droge dhe instalimin e pajisjeve për rritjen e bimëve narkotike.
Gjatë operacioneve policore në Spanjë, janë zbuluar dy ambiente të përshtatura posaçërisht për kultivim droge, një në Oropesa dhe një tjetër në Cabanes.
Interpol Tirana është duke bashkëpunuar ngushtë me Interpol Madrid për procedurat e ekstradimit të të arrestuarit drejt Spanjës.