Një moment historik për artin koreografik dhe një burim krenarie për kulturën shqiptare: koreografi me famë botërore, Angjelin Preljocaj, është pranuar zyrtarisht si anëtar i Akademisë së Arteve të Bukura të Francës.
Lajmi u bë i ditur nga Ambasada e Shqipërisë në Francë, e cila e cilësoi këtë ngjarje si një ditë të jashtëzakonshme për artistin francez me rrënjë shqiptare.
“Ky është një moment krenarie për Shqipërinë dhe për kulturën shqiptare,” thuhet në njoftimin e ambasadës, që fton gjithashtu ndjekësit të ndjekin drejtpërdrejt ceremoninë e pranimit. Ajo do të mbahet të mërkurën, më 21 maj 2025, në orën 15:00, në ambientet madhështore të Kupolës së Institutit të Francës (Institut de France), një nga institucionet më të larta të dijes dhe kulturës franceze.
Në përmbyllje të ceremonisë, Preljocaj do të nderohet me Shpatën e Akademikut, një simbol i nderimit të lartë që do t’i dorëzohet nga artistja dhe designerja e njohur franceze me famë ndërkombëtare, Constance Guisset, e cila ka dizajnuar enkas për të këtë objekt unik dhe të ngarkuar me domethënie.
Angjelin Preljocaj është një nga emrat më të shquar të skenës ndërkombëtare të vallëzimit bashkëkohor, me një karrierë të jashtëzakonshme që e ka bërë të njohur jo vetëm në Francë, por në të gjithë botën. Pranimi i tij në Akademinë e Arteve të Bukura është jo vetëm një njohje personale, por edhe një afirmim i rolit të artit shqiptar në skenën globale.