Videoja virale që zbuloi CEO-n e kompanisë “Astronomer”, Andy Byron, në një përqafim intim me shefen e Burimeve Njerëzore, Kristin Cabot, gjatë koncertit të grupit “Coldplay” në Boston, është filmuar nga Grace Springer, një 28-vjeçare nga New Jersey.
Springer, një fanse e zjarrtë e grupit, ndodhej në koncert me miqtë kur kamera e stadiumit fokusoi Byron dhe Cabot, të përqafuar. Reagimi i menjëhershëm i çiftit – ku CEO u fsheh pas një barriere dhe Cabot mbuloi fytyrën nga sikleti – ndezi rrjetin, duke bërë që videoja të shpërndahej me shpejtësi të jashtëzakonshme.
Në një intervistë për The Sun, Grace shpjegoi se nuk kishte ide për identitetin e dy personave kur postoi pamjet:
“Një pjesë e imja ndihet keq që videoja ua përmbysi jetën, por kur luan lojëra budallaqe, fiton çmime budallaqe.”
Videoja e saj ka mbledhur mbi 46 milionë shikime dhe afro 5 milionë pëlqime, duke shkaktuar një valë reagimesh dhe diskutimesh në rrjet.
Pavarësisht pasojave për personat e përfshirë, Grace u shpreh me shpresë për bashkëshorten e CEO-së:
“Shpresoj që kjo video të jetë një bekim i maskuar për të — një mundësi për të rifilluar jetën dhe për të gjetur lumturinë që meriton.”
Ngjarja ka hapur diskutime të gjera mbi etikën në vendin e punës, besnikërinë dhe ndikimin e mediave sociale në jetën private të individëve.