Organizata Human Rights Watch së fundmi ka dalë me paralajmërimin se Bashkimi Evropian dhe Mbretëria e Bashkuar po e trajtojnë Ballkanin si “depo për emigrantët”, nëpërmjet planeve për ngritjen e qendrave të kthimit jashtë territorit të tyre.
Në lidhje me këtë situatë HRW i bëri thirrje Brukselit dhe Londrës që t’i japin fund kësaj qasjeje dhe të ndihmojnë vendet e rajonit në ndërtimin e sistemeve efektive të azilit.
Kujtojmë se së fundmi BE-ja miratoi një mekanizëm që u lejon shteteve anëtare të transferojnë azilkërkues të refuzuar në vende të treta, ndërsa Britania nisi bisedimet për ngritjen e qendrave të tilla, me fokus të veçantë në Ballkanin Perëndimor.
Starmer përmendi këtu Shqipërinë si dhe dha njoftimin dhe për një paketë investimesh për Maqedoninë e Veriut.
OJQ-ja kërkon që përkrahja ndërkombëtare të fokusohet te përmirësimi i infrastrukturës ekzistuese për mbrojtjen e migrantëve, dhe jo në zhvendosjen e përgjegjësisë në vende më të dobëta.