Kreu i Urgjencës Kombëtare Mjekësore, Skënder Brataj, ka dhënë sot udhëzime të qarta për qytetarët që mund të ndodhen pranë vatrave të zjarrit.
Sipas tij, gjëja më e rëndësishme është të ruani qetësinë dhe të vlerësoni menjëherë situatën: drejtimin e flakëve, erën dhe rrugët e mundshme të largimit. “Mos humbni kohë me sende të parëndësishme, siguria vjen e para,” – apelon Brataj.
Ai këshillon të lëvizni drejt zonave të hapura dhe të sigurta, larg kodrave dhe bimësisë së dendur. Nëse nuk ka rrugëdalje, kërkoni një zonë tashmë të djegur ose pa bimësi, qëndroni afër tokës ku tymi është më pak i përqendruar, dhe mbuloni hundën e gojën me një pëlhurë të lagur.
Brataj paralajmëron se fshihja në automjete mund të jetë fatale kur flakët janë shumë pranë, për shkak të rrezikut nga mbinxehja.
Në çdo rast rreziku, telefononi 127 për ndihmë mjekësore ose 112 për të raportuar zjarrin dhe pozicionin tuaj. Dërgimi i lokacionit përmes GPS-it mund të ndihmojë ekipet e shpëtimit të mbërrijnë më shpejt.
Edhe nëse nuk keni djegie të dukshme, ekspozimi ndaj tymit mund të dëmtojë mushkëritë – ndaj Brataj rekomandon kontroll mjekësor menjëherë pasi të jeni në siguri.
“Ruani qetësinë, merrni vendime të shpejta dhe kërkoni ndihmë menjëherë. Çdo sekondë ka rëndësi,” – thekson ai.