Vitamina D luan një rol kyç për shëndetin e kockave, zemrës, muskujve dhe disa herë edhe për parandalimin e disa llojeve të kancerit. Por gjatë muajve të ftohtë, marrja e sasisë së duhur bëhet më e vështirë, kryesisht për shkak të mungesës së diellit.
Sipas Dr. Mike Ren, profesor ndihmës në Baylor College of Medicine, ekspozimi ndaj diellit është mënyra më natyrale për të marrë vitaminë D, por rrezet e diellit gjatë lindjes ose perëndimit nuk janë mjaftueshëm efektive. Një ekspozim i drejtpërdrejtë ndaj diellit për rreth 15–30 minuta në ditë, edhe kur jeni të veshur, mund të sigurojë bazën e nevojshme për trupin.
Ushqimet e pasura me vitaminë D, si peshqit yndyrorë dhe disa fruta deti, ndihmojnë, por zakonisht nuk janë të mjaftueshme. Prandaj, gjatë dimrit ose kur kaloni shumë kohë brenda, Dr. Ren rekomandon përdorimin e suplementeve. Ai sugjeron një bazë prej rreth 5000 njësi ndërkombëtare në ditë, duke përmendur se kjo është e sigurt dhe trupi përthith pjesën që i nevojitet, ndërsa teprica nxirret jashtë.
Për individët që kanë kaluar operacione për humbje peshe, si gastric sleeve, apo ata me sëmundje të veshkave, mëlçisë ose fibrozozë cistike, suplementimi mund të jetë edhe më i nevojshëm, pasi këto kushte pengojnë përthithjen normale të vitaminës D.
Dr. Ren thekson gjithashtu se vitamina D ka ndikim të rëndësishëm në funksionin e muskujve, zemrës dhe shëndetin e përgjithshëm, dhe se kontrollimi i niveleve në gjak është thelbësor për të siguruar mirëqenie optimale.