Kryeministri izraelit Benjamin Netanyahu zhvilloi një vizitë në Pentagon pas operacionit të fundit ushtarak të përbashkët mes Izraelit dhe Shteteve të Bashkuara ndaj objektivave iraniane, të cilin e cilësoi si një “ulërimë e dy luanëve që e dëgjoi e gjithë bota”.
Gjatë takimit me zyrtarë të lartë të mbrojtjes amerikane, Netanyahu tha se ky operacion ishte një demonstrim i qartë i forcës, me pasoja të rëndësishme për paqen në Lindjen e Mesme. “Fillimisht vjen fuqia, pastaj paqja”, deklaroi ai.
Kryeministri izraelit u prit nga Sekretari amerikan i Mbrojtjes, Pete Hegseth, nga admirali Christopher Grady, nënkryetar i Shtabit të Përbashkët të Ushtrisë Amerikane, dhe nga gjenerali Erik Kurilla, ish-komandant i CENTCOM, si dhe zyrtarë të tjerë të lartë.
Në qendër të diskutimeve ishin edhe avionët bombardues strategjikë B-2, që u angazhuan në goditjen e objekteve iraniane të dyshuara për veprimtari bërthamore.
“Pilotët e B-2 dërguan një mesazh të qartë për botën,” tha Hegseth, ndërsa Netanyahu shtoi: “Irani e mori mesazhin. Dhe me siguri, edhe e gjithë Lindja e Mesme.”
Vizita vjen në një moment tensionesh të larta në rajon, ku mbështetja e SHBA-së për Izraelin dhe aksionet e fundit ushtarake po riformulojnë balancat strategjike në Lindjen e Mesme.