Kandidati opozitar për Bashkinë e Tiranës, Florian Binaj, deklaroi se në fletën e votimit do të paraqitet si kandidat i pavarur, duke theksuar se nuk është në garë për të përfaqësuar asnjë forcë politike, por qytetarët e Tiranës.
“Unë nuk kam hyrë në garë për të përfaqësuar opozitën, por qytetarët e Tiranës. Nuk i ndaj sipas ngjyrave të partive. Nëse ajri është i pastër, është për të gjithë. Nëse ka trafik, ka për të gjithë,” tha Binaj.
Ai sqaroi se nuk ka pasur asnjë komunikim me ish-kryeministrin Sali Berisha apo përfaqësues të tjerë të opozitës. “Edhe pasi u shpalla kandidat, nuk kam folur me Berishën apo me ndonjë tjetër nga opozita. Ka qenë Adriatik Lapaj i pari që më mori në telefon, mendova se ishte kamera e fshehtë. Më tha: ‘Ne do të të mbështesim’. Të nesërmen reagoi edhe Sali Berisha me mbështetjen e tij,” u shpreh ai.
Binaj theksoi se nuk do të dalë në fushatë me asnjë kryetar partie, përfshirë Berishën: “Nuk do të shoqërohem në fushatë me asnjë kryetar. U kam kërkuar të sjellin grupe pune, por jo liderë partie. Në fletën e votimit do të jem kandidat i pavarur, dhe këtë do ta kërkojmë zyrtarisht në KQZ,” përfundoi ai.