Këshilli i Ministrave ka zhvilluar sot mbledhjen e radhës, nga e cila dolën disa vendime të rëndësishme në fushën e administratës publike, ekonomisë blu dhe sigurisë.
Në kuadër të riorganizimit të disa institucioneve, qeveria miratoi ndryshime në disa poste drejtuese dhe zëvendësministra:
Armela Baka emërohet zëvendësministre e Arsimit, duke zëvendësuar Endrit Hoxhën, i cili lirohet nga kjo detyrë.
Martin Kajo emërohet zëvendësministër i Ekonomisë dhe Inovacionit, në vend të Sokol Dumës.
Holta Duda merr detyrën e prefektes së Qarkut Shkodër, duke zëvendësuar Majlinda Angonin.
Albana Hasanaj emërohet prefekte e Qarkut Gjirokastër, në vend të Odise Kotes.
Ndryshime janë bërë edhe në Këshillin Drejtues të Agjencisë Shtetërore të Kadastrës:
Viola Haxhiademi emërohet përfaqësuese e Ministrisë së Infrastrukturës dhe Energjisë, në vend të Ermal Nufit.
Dritan Palnikaj emërohet përfaqësues i Ministrisë së Bujqësisë dhe Zhvillimit Rural, në vend të Alban Mësonjësit.
Në mbledhjen e sotme, qeveria miratoi gjithashtu rregullat e reja për inspektimin e peshkimit, me qëllim parandalimin dhe eliminimin e peshkimit të paligjshëm dhe krijimin e një skeme certifikimi për zëniet e peshkut në import-eksport.
Një tjetër vendim i rëndësishëm ishte propozimi për aderimin e Shqipërisë në Traktatin e Marrakeshit (2013), që synon lehtësimin e aksesit në veprat e botuara për personat e verbër ose me vështirësi në leximin e teksteve të shtypura.