Çmimet e naftës shënuan rritje të ndjeshme të martën, duke kaluar pragun e 85 dollarëve për fuçi dhe duke arritur nivelin më të lartë të javëve të fundit. Rritja vjen si pasojë e përshkallëzimit të tensioneve mes Shteteve të Bashkuara dhe Iranit, si dhe ndërprerjeve të transportit detar në Ngushticën e Hormuzit, një nga korridoret më të rëndësishme energjetike në botë.
Nafta e papërpunuar Brent u rrit me 2,4%, ndërsa që nga fillimi i javës fitimet kanë kaluar 13%, të nxitura nga shqetësimet për furnizimin global me energji.
Sipas Komandës Qendrore të SHBA-së (CENTCOM), forcat amerikane zhvilluan një operacion pesëorësh kundër objektivave ushtarake iraniane përgjatë bregdetit jugor të vendit. Sulmet goditën sisteme të mbrojtjes bregdetare, baza raketore, objekte të dronëve dhe kapacitete detare në zonat e Bushehr, Chah Bahar, Jask, Konarak, Abu Musa dhe Bandar Abbas.
CENTCOM deklaroi se operacioni kishte për synim dobësimin e aftësive të Iranit për të kërcënuar anijet tregtare që kalojnë nëpër Ngushticën e Hormuzit.
Nga ana tjetër, presidenti amerikan Donald Trump njoftoi se SHBA-ja po rivendos bllokadën ndaj Iranit dhe anijeve që zhvillojnë tregti me Teheranin, duke theksuar se operacionet ushtarake synojnë mbrojtjen e lirisë së lundrimit në këtë korridor strategjik.
Për shkak të situatës së tensionuar, trafiku tregtar në Ngushticën e Hormuzit është ngadalësuar ndjeshëm, mes paralajmërimeve për sigurinë dhe pasigurive në rritje lidhur me zhvillimet e fundit.
Trump deklaroi gjithashtu se Uashingtoni pret që vendet e Gjirit, përfshirë Arabinë Saudite, Emiratet e Bashkuara Arabe, Katarin, Kuvajtin dhe Bahreinin, të kontribuojnë financiarisht për mbrojtjen që SHBA ofron në këtë rrugë detare.
Përshkallëzimi i konfliktit ka rritur frikën për ndërprerje të furnizimit me naftë dhe gaz natyror të lëngshëm, duke shtuar paqartësitë në tregjet ndërkombëtare të energjisë.