Komisioni i Ekonomisë, Punësimit dhe Financave ka miratuar projektbuxhetin e shtetit për vitin 2026, pas një seance të gjatë diskutimesh dhe dëgjimesh me institucionet. Dokumenti financiar u kalua me 7 vota pro, ndërsa të gjitha amendamentet e propozuara nga opozita – rreth 60 në total – u rrëzuan.
Buxheti për vitin 2026, me vlerë rreth 8.9 miliardë euro, nuk pëson ndryshime në total, por vetëm rialokime të brendshme fondesh. Pjesa më e madhe e shpenzimeve fokusohet tek Shëndetësia, Mbrojtja Sociale, Infrastrukturat, investimet publike, pagat dhe pensionet. Ndërkohë, 12 institucione publike do të përfitojnë fonde dhe punonjës shtesë, me një total shpenzimesh shtesë prej 504.9 milionë lekësh.
Opozita paraqiti një sërë amendamentesh që synonin rritjen e fondeve për fusha të ndryshme sociale dhe ekonomike. Deputetët e Partisë Demokratike kërkuan, ndër të tjera, pagesën e 13-të për mësuesit, shtimin e oficerëve të sigurisë nëpër shkolla, kompensime pas përmbytjeve në Gjirokastër, rritjen e fondeve për arsimin dhe mbështetje për bizneset eksportuese të prekura nga kursi i euros. Po ashtu u kërkua rritja e pensioneve me 16.2 miliardë lekë që prej vitit të ardhshëm. Megjithatë, asnjë nga këto propozime nuk u mor parasysh nga shumica.
Edhe dy amendamentet e depozituara nga deputeti socialist Erion Braçe – që synonin rishpërndarjen e të ardhurave shtesë nga sigurimet shoqërore drejt politikave të pensioneve dhe kalimin e fondeve të papërdorura në fondin e pensioneve – u rrëzuan gjithashtu.
Në komision u miratuan vetëm rialokimet e fondeve mes institucioneve, ndërsa projektbuxheti, së bashku me paketën fiskale prej tetë projektligjesh, pritet të marrë miratimin përfundimtar në seancën plenare të datës 11 dhjetor.