Kaliumi është një nga mineralet më të rëndësishme për trupin e njeriut – çdo qelizë ka nevojë për të për të funksionuar siç duhet. Por me gjithë rëndësinë e tij, organizmi nuk mund ta prodhojë vetë dhe duhet ta sigurojë përmes ushqimit. Sot, më pak se 2% e njerëzve në vendet e zhvilluara, përfshirë SHBA-në, marrin sasinë e rekomanduar ditore prej 4.700 mg.
Dikur, njerëzit konsumonin deri në 10.000 mg kalium në ditë përmes dietave natyrale dhe të pasura me fruta e perime të freskëta. Sot, dietat moderne të mbushura me produkte të përpunuara kanë çuar në rënie të madhe të konsumit të këtij minerali jetik.
Studimet tregojnë se një rritje modeste prej vetëm 1.640 mg kalium në ditë lidhet me një ulje deri në 21% të rrezikut për goditje në tru. Efekti është edhe më i madh nëse kjo sasi dyfishohet përmes një ushqyerjeje të shëndetshme.
Shumë besojnë se banania është burimi më i mirë i kaliumit, por faktikisht ajo nuk renditet as në 1.500 ushqimet më të pasura me këtë mineral. Për të përmbushur nevojën ditore vetëm me banane, duhet të konsumohen mbi 10 copa në ditë – një sfidë e madhe!
Burimet më të pasura janë perimet me gjethe jeshile (si spinaqi), patatet e ziera me lëkurë, bishtajoret (fasule, thjerrëza, sojë), arrorët, drithërat integrale, avokado, domatet, pjepri dhe bulmeti i freskët.
Përveç kaliumit, një dietë e pasur me produkte bimore ndihmon edhe në balancimin e mineraleve të tjera si magnezi dhe natriumi, duke ulur presionin e gjakut dhe duke mbrojtur zemrën e trurin nga sëmundje kronike.