Pikat kufitare të jugut po përballen me një rritje të konsiderueshme të fluksit të qytetarëve dhe automjeteve që hyjnë dhe dalin nga Shqipëria.
Më e ngarkuara mbetet pika e Kakavijës ku vetëm gjatë 24 orëve të fundit janë përpunuar mbi 13,000 shtetas dhe rreth 4,300 mjete.
Fluksi më i madh është regjistruar në orët e para të mëngjesit, për shkak të mbërritjes së linjave të autobusëve nga Greqia. Aktualisht, policia kufitare shqiptare operon me 7 sportele aktive (4 në dalje dhe 3 në hyrje), ndërsa pala greke vetëm me 4, gjë që vështirëson menaxhimin.
Ndërkohë, pika kufitare Tre Urat në Përmet ka pasur situatë më të qetë, me vetëm 785 shtetas dhe 365 mjete të përpunuara gjatë 24 orëve të fundit.
Autoritetet e Policisë Kufitare theksojnë se janë në gatishmëri për të përballuar rritjen sezonale të lëvizjeve dhe nënvizojnë rëndësinë e bashkëpunimit me palën greke për shmangien e radhëve dhe përshpejtimin e procedurave.