Prokuroria pranë Gjykatës së Shkallës së Parë të Juridiksionit të Përgjithshëm Elbasan ka nisur një hetim penal ndaj mësuesit Fatmir Hoxha, pas dyshimeve për ngacmim seksual ndaj dy nxënëseve në shkollën ku ai jepte mësim në Prrenjas.
Sipas kallëzimit të bërë më 16 prill 2025 nga drejtori i shkollës “Sali Halili” në fshatin Rrajcë, ku mësuesi ishte i emëruar, Hoxha dyshohet se ka kryer ngacmime seksuale ndaj dy nxënëseve në klasën e VIII dhe IX të shkollës vartëse “Ali Hana”, në fshatin Skënderbej.
Pas marrjes së kallëzimit, Prokuroria urdhëroi kryerjen e veprimeve të para hetimore, përfshirë marrjen në pyetje të stafit të shkollës dhe prindërve të vajzave, si dhe administrimin e dokumentacionit të institucionit arsimor. Mësuesi është pezulluar menjëherë nga detyra.
Nga hetimet paraprake rezulton se Hoxha ka shfrytëzuar pozicionin e tij si mësues për të krijuar situata ku nxënëset ndodheshin vetëm dhe më pas ka ndërmarrë veprime me natyrë ngacmuese seksuale ndaj tyre.
Në momentin kur autoritetet po përpiqeshin ta gjenin, Fatmir Hoxha nuk u gjend në banesën e tij. Ai u ndalua në orët e mbrëmjes të së njëjtës ditë në Pikën e Kalimit Kufitar të Rinasit, teksa tentonte të largohej drejt Austrisë.
Për shkak të natyrës së rëndë të çështjes, Prokuroria e Elbasanit ka ngritur një grup të posaçëm hetimor të përbërë nga prokurorë dhe oficerë të specializuar për çështje që përfshijnë viktima të mitur. Janë vënë gjithashtu në dijeni strukturat për mbrojtjen e fëmijëve dhe autoritetet shtetërore përgjegjëse.
Hetimet po vijojnë për të zbardhur plotësisht ngjarjen dhe për të identifikuar raste të tjera të mundshme të ngjashme në të njëjtën shkollë.