Kryepeshkopi i Tiranës, Durrësit dhe gjithë Shqipërisë, Imzot Joani, uroi besimtarët ortodoksë me rastin e Pashkës, duke theksuar fuqinë transformuese të Ngjalljes së Krishtit.
Në mesazhin e tij, ai theksoi se Pashka është themeli i besimit të krishterë, sepse përmes Ngjalljes, njeriu merr kuptimin dhe shpresën për jetë të përjetshme. Kryepeshkopi solli në kujtesë edhe ndarjen nga jeta të Kryepeshkopit Anastas, duke thënë se ai tani ndërmjetëson për të gjithë pranë Zotit.
Duke iu referuar realitetit të vështirë që përjeton bota sot, me luftëra, padrejtësi dhe varfëri, Imzot Joani nënvizoi se drita e Pashkës është përgjigjja ndaj errësirës shpirtërore që ka pllakosur njerëzimin. “Sa më e madhe errësira, aq më shumë kemi nevojë për dritë,” u shpreh ai.
Në përfundim, Kryepeshkopi ftoi të gjithë të përqafojnë mesazhin e dashurisë dhe faljes që sjell Ngjallja e Krishtit, duke shtuar se “Ngjallja nuk është vetëm një kujtim, por një përvojë e gjallë që na jep shpresë për një të ardhme më të ndritur.”