Sipas një raporti të Bankës Botërore, familjet shqiptare kanë përfituar mesatarisht 2 mijë euro vitin e kaluar. Këto para kanë mbuluar rreth 18% të nevojave të tyre për ushqim dhe ilaçe. Raporti thekson se remitancat kanë ndihmuar në uljen e varfërisë me 8%, veçanërisht për familjet që mbështeten tërësisht në këto transferta, duke përmirësuar ndjeshëm situatën sociale dhe ekonomike në Shqipëri.
Këto përfundime të Bankës Botërore janë të përputhshme me përvojat e atyre që marrin para nga të afërmit jashtë vendit. “Po mos kemi fëmijët ne vdesim. Nuk na mjafton pensioni që marrim. Tani që janë rritur çmimet jemi të detyruar që t’u kërkojmë fëmijëve më shumë para. Unë kam vëllezërit që më ndihmojnë se përndryshe…”, citon raporti një qytetar.
Raporti i Bankës Botërore tregon se rreth 174 mijë familje shqiptare, ose 23% e totalit, varen pjesërisht ose tërësisht nga paratë që iu dërgojnë të afërmit nga jashtë. Sipas Bankës Botërore, remitancat janë dyfish më të larta se sa raportohen nga Banka e Shqipërisë. Vjet, emigrantët dërguan gjithsej 1.9 miliardë euro, një shifër që është 971 milionë euro ose 104.5% më e lartë se ajo që deklaron Banka e Shqipërisë.