Specialistët për Hetimin e Krimeve Ekonomiko-Financiare kanë arrestuar shtetasin S. M., 56 vjeç, me profesion mjek, pasi në pamjet e transmetuara nga emisioni investigativ “Stop” shfaqej duke ngacmuar seksualisht një paciente.
Pak minuta pas publikimit të materialit filmik, Operatorit i Shërbimeve të Kujdesit Shëndetësor njoftoi lirimin e menjëhershëm nga detyra të mjekut Sinan M., pjesë e Qendrës Shëndetësore nr. 10, duke e konsideruar sjelljen e tij shkelje të rëndë të etikës profesionale. Vendimi u mor në përputhje me Kodin e Punës dhe rregulloren e brendshme të institucionit.
Rasti nisi kur një qytetare, që kishte shkuar fillimisht në një farmaci pranë qendrës për shqetësime shëndetësore, u takua me mjekun, i cili e ftoi në qendrën shëndetësore për një kontroll më të detajuar. Gjatë vizitës së parë, ai iu afrua në mënyrë të pazakontë, duke bërë pyetje për jetën e saj private. Në vizitën e dytë, sjellja e tij u intensifikua dhe doli përtej çdo raporti profesionist mjek-pacient.
Në vizitën e tretë, sipas pamjeve të publikuara, mjeku kaloi në ngacmim seksual të hapur, duke bërë komente me përmbajtje erotike, duke e prekur pa leje dhe duke i kërkuar favore seksuale, deri në momentet kur u zhvesh brenda zyrës së qendrës shtetërore.
Autoritetet kanë nisur hetimet dhe rasti pritet të ndiqet penalisht.