Një 27-vjeçar është arrestuar nga Policia e Tiranës pasi dyshohet se ka kanosur me armë zjarri një shtetas gjatë një konflikti të çastit në zonën e “Kthesës së Kamzës”.
Sipas njoftimit zyrtar, i riu, identifikuar si L. M., kishte me vete një armë zjarri të mbushur dhe gati për qitje, me të cilën ka kërcënuar 32-vjeçarin A. R. Menjëherë pas ngjarjes, vëllai i tij, R. M., 25 vjeç, dyshohet se ka ndërhyrë për të fshehur armën, duke u bërë bashkëpunëtor në ngjarje. Të dy janë arrestuar në flagrancë nga shërbimet e Komisariatit të Policisë Nr. 6, në bashkëpunim me forcat operacionale dhe Komisariatin Nr. 7.
Gjatë kontrollit në banesën e autorit, policia gjeti dhe sekuestroi armën e zjarrit të përdorur në konflikt, një sasi municioni luftarak dhe një automjet, të cilat tashmë do të shërbejnë si prova materiale në procesin hetimor. Materialet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm në Tiranë për veprime të mëtejshme ligjore.
Radar.al