Në mbyllje të Legjislaturës së X-të, Kryetarja e Kuvendit Elisa Spiropali vlerësoi punën e bërë gjatë katër viteve të fundit duke e cilësuar këtë periudhë si të rëndësishme për procesin e integrimit europian dhe zhvillimin e vendit. Ajo tha se janë zhvilluar 189 seanca plenare dhe janë miratuar 521 akte, mes tyre 328 ligje, 193 marrëveshje ndërkombëtare, 480 vendime dhe 106 rezoluta.
Spiropali theksoi se legjislatura ka miratuar ligje të rëndësishme që lidhen me energjinë, mbrojtjen e mjedisit, sigurinë kibernetike, barazinë gjinore, digjitalizimin, investimet, përmirësimin e shërbimeve publike dhe rritjen e të ardhurave të qytetarëve.
Ajo shprehu mirënjohje për të gjithë deputetët, zëvendëskryetarët e Kuvendit, kryetarët e komisioneve, gazetarët, median, shërbimet parlamentare dhe qytetarët, duke theksuar se pavarësisht debateve dhe përplasjeve, të gjithë bashkë kanë dhënë maksimumin për Shqipërinë.
Duke folur për periudhën e saj si Kryetare e Kuvendit, Spiropali e cilësoi atë si privilegjin dhe sfidën më të madhe të jetës së saj politike, ndërsa vlerësoi votimin e reformës zgjedhore, bashkëpunimin rajonal dhe intensifikimin e diplomacisë parlamentare si disa nga arritjet më të spikatura.
Ajo nënvizoi se Shqipëria ka përshpejtuar procesin e anëtarësimit në Bashkimin Evropian dhe është bërë një nga vendet kryesore kandidate. Sipas saj, përparimi është pasqyruar edhe në rritjen e të ardhurave për frymë, rritjen e pagës mesatare dhe uljen e papunësisë.
Spiropali theksoi se legjislatura e ardhshme do të ketë përpara sfidën për t’i vënë vulën anëtarësimit të Shqipërisë në BE, duke përmendur nevojën për modernizimin e procesit ligjvënës, përmirësimin e infrastrukturës parlamentare dhe forcimin e komisioneve të posaçme.
Në fund, ajo u shpreh se Kuvendi i ri duhet të jetë më efikas, më i hapur, më transparent dhe më afër qytetarëve, në mënyrë që të forcojë demokracinë, të avancojë reformat dhe të mbrojë vlerat e shtetit të së drejtës.