Mbrojtësi i Paris Saint-Germain dhe i kombëtares së Marokut, Achraf Hakimi, mund të përballet me një proces penal pas akuzave për përdhunim, raportoi “Le Parisien”. Prokuroria e Nanterre paraqiti më 1 gusht 2025 kërkesën për ngritjen e aktakuzës, duke e çuar çështjen në gjykatën penale të Hauts-de-Seine.
Ngjarja e dyshuar daton në shkurt 2023, në banesën e futbollistit në Boulogne-Billancourt pranë Parisit. Sipas denoncimit, viktima 26-vjeçare kishte komunikuar me Hakimin përmes Instagram-it për më shumë se një muaj para se të takohej me të. Ajo pretendon se lojtari e ka prekur dhe puthur pa pëlqimin e saj, më pas e ka detyruar me forcë.
Fillimisht, e reja nuk bëri kallëzim formal, por më vonë dorëzoi mesazhe te hetuesit që, sipas saj, tregonin traumën e përjetuar. Hakimi, i cili u mor në pyetje dhe kaloi disa orë në paraburgim më 3 mars 2023, e ka mohuar kategorikisht akuzën, duke e quajtur një tentativë për shantazh financiar.
Në dhjetor 2023, lojtari dhe paditësja u përballën në gjykatë, duke mbajtur qëndrime të kundërta. PSG ka vazhduar të qëndrojë në krah të mbrojtësit maroken, duke thënë se beson në procesin gjyqësor. Mungesat e tij në stërvitje janë justifikuar nga klubi si “arsye personale”.
“E vërteta është që kur je i suksesshëm, bëhesh një shënjestër e lehtë. Ata donin të më shantazhonin,” deklaroi Hakimi në janar 2025 për një bloger, duke shtuar se “drejtësia ka vepruar mirë deri tani”.
Dosja ndodhet ende në duart e gjyqtarit hetues, i cili do të vendosë nëse çështja do të shkojë në proces penal. Nëse shpallet fajtor, Hakimi rrezikon deri në 15 vite burg.