Ditën e sotme Gjykata e Posaçme kundër Korrupsionit dhe Krimit të Organizuar ndryshoi masën e sigurisë për personin e arrestuar në lidhje me masakrën e Dobraçit.
GJKKO caktoi ndryshimin e masës nga “arrest me burg” në “arrest shtëpie” për shtetasin Gjuljo Vuksani. Vendimi në fjalë u mor nga gjyqytari i Posaçëm Erjon Çela, i cili pranoi kërkesën e SPAK për ndryshimin e masës së sigurisë ndaj Vuksanit.
Kështu u rrëzua kërkesa për arrestimin e tij e dhënë nga prokurorja Elida Kackini. Kujtojmë se Vuksani dyshohet se ishte personi që siguroi automjetin tip “Range Rover” që u përdor nga autorët për të vrarë 4 personat në Dobraç.
Kujtojmë se masakra e Dobraçit ndodhi pasditen e 30 tetorit nga i cili humbën jetën 4 persona, mes tyre dhe 2 qytetarë të pafajshëm që nuk kishin lidhje me ngjarjen.
Njoftimi i plotë:
- Kërkuesi Prokuroria e Posaçme kundër Korrupsionit dhe Krimit të Organizuar me datë 12.05.2025 ka paraqitur pranë Gjykatës kërkesën me objekt: “Zëvendësim i masës së sigurimit personal “Arrest në burg”, e caktuar ndaj personit nën hetim Gjuljo Vuksani me vendimin nr. 139, datë 17.11.2024 të Gjykatës së Posaçme të Shkallës së Parë për Korrupsionin dhe Krimin e Organizuar me masën e sigurimit personal “Arrest në shtëpi”, e parashikuar nga neni 237 i K.Pr.Penale”.
- Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Çela, bazuar në nenet 112, 237 dhe 260/2 të K.Pr.Penale, me vendimin Nr. 306, datë 14.05.2025, vendosi:
- Pranimin e kërkesës së kërkuesit Prokuroria e Posaçme kundër Korrupsionit dhe Krimit të Organizuar.
- Zëvendësimin e masës së sigurimit personal me karakter shtrëngues “Arrest në burg”, e parashikuar nga neni 238 i K.Pr.Penale, e caktuar ndaj personit nën hetim Gjuljo Vuksani me vendimin nr. 139, datë 17.11.2024 të Gjykatës së Posaçme të Shkallës së Parë për Korrupsionin dhe Krimin e Organizuar me masën e sigurimit personal “Arrest në shtëpi”, e parashikuar nga neni 237 i K.Pr.Penale.
- Urdhërohet personi nën hetim Gjuljo Vuksani që të mos largohet nga banesa e tij që ndodhet në ****
- Urdhërohet lirimi i menjëhershëm i personit nën hetim Gjuljo Vuksani nga ambjentet e paraburgimit nëse ai nuk mbahet i arrestuar me ndonjë masë tjetër sigurimi “Arrest në burg”, si i dyshuar për kryerjen e ndonjë vepre tjetër penale apo me ndonjë vendim dënimi me burgim.
- Urdhërohet policia gjyqësore dhe Prokuroria e Posaçme kundër Korrupsionit dhe Krimit të Organizuar për zbatimin e këtij vendimi.
- Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar brenda 5 ditëve, afat ky që fillon nga dita e nesërme e njoftimit të vendimit.