Komisionerja Evropiane për Zgjerim, Marta Kos, ka reaguar ashpër ndaj deklaratës së ministres serbe të Administratës Shtetërore dhe Vetëqeverisjes Lokale, Snezhana Paunoviq, e cila tha se, po të kishte qenë në vend të Slobodan Millosheviqit në vitin 1998, do ta kishte “pastruar etnikisht Kosovën”.
Duke folur në një konferencë për media në Bruksel, pas mbylljes së dy kapitujve të negociatave të anëtarësimit me Malin e Zi, Kos u shpreh se është e tronditur nga deklarata të tilla, duke theksuar se në Evropë nuk ka vend për retorikë që justifikon apo promovon spastrimin etnik.
“Mund të ketë vetëm zero tolerancë për deklarata të tilla. Nuk ka vend në Evropë për retorikën që justifikon, avokon apo glorifikon spastrimin etnik. Jam personalisht e tronditur që një gjë e tillë është thënë. Deklarata të tilla janë në kundërshtim të drejtpërdrejtë me vlerat, dinjitetin njerëzor, pajtimin, llogaridhënien dhe marrëdhëniet e mira fqinjësore mbi të cilat është ndërtuar Bashkimi Evropian”, deklaroi Kos.
E pyetur nëse Komisioni Evropian vazhdon të mbajë të njëjtin vlerësim për angazhimin e Serbisë në procesin e normalizimit të marrëdhënieve me Kosovën, komisionerja tha se deklarata të tilla bien ndesh edhe me detyrimet që Beogradi ka marrë në kuadër të dialogut të ndërmjetësuar nga Bashkimi Evropian.
“Këto deklarata janë në kundërshtim edhe me obligimet e Serbisë në dialogun e lehtësuar nga BE-ja për normalizimin e marrëdhënieve me Kosovën. Mund të supozoj vetëm se ky është qëndrimi personal i një ministreje dhe nuk përfaqëson qëndrimin e qeverisë së Serbisë. Presim që liderët politikë të veprojnë me përgjegjësi, të shmangin gjuhën nxitëse dhe të kontribuojnë në ndërtimin e besimit, pajtimit dhe stabilitetit në rajon”, u shpreh ajo.
Deklarata e ministres serbe Snezhana Paunoviq ka shkaktuar reagime të shumta në Kosovë dhe në arenën ndërkombëtare, duke u dënuar gjerësisht si gjuhë që nxit urrejtje dhe bie ndesh me vlerat themelore të Bashkimit Evropian.