Prokurorja e Përgjithshme e SHBA-së, Pam Bondi, tha se presidenti Donald Trump “ndoshta” do të largohet nga Shtëpia e Bardhë pas mandatit të tij të dytë dhe se ndryshimi i Kushtetutës për të lejuar një mandat shtesë do të ishte një “mision i vështirë”.
“Unë mendoj se ndoshta do të përfundojë pas këtij mandati”, tha Bondi.
E pyetur pse e përdori fjalën “ndoshta”, Bondi u përgjigj: “Duhet të shikojmë kushtetutën”, duke vënë në dukje se do të ishte një “mision i vështirë” për ta ndryshuar atë në mënyrë që Trump të mund të shërbente edhe katër vjet të tjera, shkruan the Guardian.
“Uroj që ai të mund të jetë presidenti ynë edhe për 20 vjet”, shtoi ajo.
Bëhet e ditur se Trump ka thënë më parë se “nuk po tallej” për një mandat të tretë dhe se “ka metoda me të cilat ai mund ta arrijë këtë”.
Amendamenti i 22-të i Kushtetutës së SHBA thotë qartë se askush nuk mund të zgjidhet president më shumë se dy herë.
Dhe Trump aktualisht po kryen mandatin e tij të dytë.
Ndryshe, një përpjekje për të ndryshuar Kushtetutën për të hequr ndalimin e Amendamentit të 22-të do të ishte pothuajse e pamundur, pasi do të kërkonte një shumicë prej dy të tretave në të dy dhomat e Kongresit dhe ratifikimin nga tre të katërtat e shteteve.