Presidenti francez Emmanuel Macron është shprehur skeptik lidhur me qëllimet e Rusisë, duke paralajmëruar se situata mbetet tejet serioze jo vetëm për Ukrainën, por edhe për Europën.
“Pyeteni veten nëse Putini dëshiron paqe. Për mendimin tim, përgjigjja është jo,” tha Macron, duke theksuar se objektivi i partnerëve europianë mbetet një “paqe e fortë dhe e qëndrueshme për Ukrainën” dhe respektimi i integritetit territorial të saj.
Ai rikujtoi se takimi i së hënës në Uashington mes Presidentit amerikan Donald Trump dhe Presidentit ukrainas Volodymyr Zelensky do të shërbejë për të treguar një front të bashkuar mes Ukrainës dhe aleatëve europianë.
“Nëse tregojmë dobësi sot ndaj Rusisë, po hapim rrugën për konflikte të ardhshme,” paralajmëroi kreu i Elysee-s, duke i bërë thirrje Europës të tregojë forcë dhe vendosmëri.
Sipas tij, nëse kontinenti dëshiron të mbetet i lirë dhe i pavarur, duhet të jetë i fortë: “Nëse jemi të dobët sot, nesër do të paguajmë një çmim të rëndë.”
Macron theksoi gjithashtu se Ukraina duhet të përfaqësohet në çdo diskutim për të ardhmen e saj dhe se formimi i një ushtrie të fortë ukrainase është garancia kryesore e sigurisë.
Ai përfundoi duke theksuar se pa një ushtri të fortë, nuk mund të ketë marrëveshje paqeje të qëndrueshme për Ukrainën dhe se Europa duhet të jetë gjithmonë pjesë e tryezës kur bëhet fjalë për çështje që prekin kontinentin.