Prokuroria e Posaçme (SPAK) ka shpallur nisjen e procedurës për përzgjedhjen e drejtuesit të ri të Byrosë Kombëtare të Hetimit (BKH), pasi mandatit pesëvjeçar të drejtoreshës aktuale Aida Hajnaj i vjen fundi më 31 gusht 2025.
Komisioni i përzgjedhjes do të kryesohet nga kreu i SPAK, Altin Dumani, dhe përbëhet gjithashtu nga prokurorët Arben Kraja dhe Behar Dibra. Kandidatët kanë afat deri më 7 maj 2025 për të dorëzuar dokumentacionin që vërteton përmbushjen e kushteve ligjore të përcaktuara në nenet 34 dhe 38 të ligjit nr. 95/2016.
Kriteret që duhet të plotësojnë kandidatët:
Të jenë shtetas shqiptarë, me integritet të lartë moral dhe profesional;
Të kenë mbaruar arsimin e lartë në drejtësi ose shkollën policore (niveli master);
Të kenë të paktën 5 vite përvojë në hetimin e çështjeve të korrupsionit, krimit të organizuar ose krimeve të rënda;
Nëse kanë qenë punonjës policie, duhet të kenë mbajtur gradë të lartë (të paktën Komisar);
Të mos jenë në proces hetimi ose gjykimi, të mos kenë mbajtur funksione politike në 10 vitet e fundit;
Të mos jenë ndëshkuar me masa disiplinore të papërfunduara dhe të kenë kaluar vlerësime etike e profesionale;
Të japin pëlqimin për testin e poligrafit dhe verifikimin e figurës;
Procesi i përzgjedhjes kalon në shtatë faza:
Verifikimi i aplikimit;
Test logjik;
Kontroll mjekësor;
Test fizik;
Ese me shkrim;
Intervistë;
Verifikim figure, deklarim i pasurisë dhe test poligrafi.
Dokumentet duhet të dorëzohen në një zarf të mbyllur në ambientet e SPAK dhe të adresohen Komisionit të Përzgjedhjes së Drejtorit të BKH.