Reshjet intensive të shiut që kanë përfshirë veriun e vendit kanë shkaktuar një rritje të pazakontë të nivelit të ujit në Liqenin e Kukësit (HEC Fierzë).
Brenda vetëm katër ditësh, niveli i ujit është rritur me rreth 11 metra – një sasi që në kushte normale do të kërkonte të paktën dy muaj për t’u akumuluar.
Prurjet në lumin Drin janë rritur ndjeshëm, nga 260 m³/s para nisjes së reshjeve në rreth 1200 m³/s aktualisht në hyrje të HEC Fierzë, duke përshpejtuar ndjeshëm mbushjen e liqenit.
Aktualisht, niveli i ujit në Fierzë ndodhet në kuotën 290.8 metra, ndërsa kuota maksimale e Liqenit të Kukësit është 296 metra. Sipas parashikimeve të ekspertëve, kjo kuotë pritet të arrihet brenda dy ditëve nëse prurjet mbeten në këto nivele.
Specialistët e HEC Fierzë bëjnë me dije se situata po monitorohet në mënyrë të vazhdueshme për të garantuar menaxhimin optimal të prurjeve dhe sigurinë e digës.
Ndërkohë, rritja e rezervave hidrike vlerësohet si pozitive për sektorin energjetik, pasi krijon kushte më të favorshme për prodhimin e energjisë elektrike, megjithëse kërkon vëmendje të shtuar në menaxhimin e kaskadës së Drinit.