Ndërsa Partia Socialiste feston fitoren dhe kryeministri Rama përgatitet për fjalimin zyrtar, në kampin blu nisën lëvizjet e para pas rezultatit zhgënjyes të zgjedhjeve të 11 majit.
Kreu i Partisë Demokratike, Sali Berisha, zhvilloi mbrëmjen e së mërkurës një mbledhje prej rreth dy orësh me drejtuesit politikë të qarqeve në selinë qendrore të PD.
Në një dalje për mediat, Berisha përsëriti akuzat për manipulim të rezultatit zgjedhor, duke deklaruar se “zgjedhjet janë grabitur”.
I pyetur për mesazhin që u jep demokratëve që pritet të kalojnë katër vite të tjera në opozitë, Berisha u përgjigj shkurt: “Zgjedhjet janë grabitur”, duke lënë të kuptohet se nuk e njeh rezultatin si legjitim.
Pas mbledhjes, përfaqësues të PD thanë se do të zhvillohet një analizë e thelluar për ecurinë dhe rezultatin, por nuk dhanë detaje për vendime konkrete, duke shtuar se ato do të bëhen publike “në kohën e duhur”.