Moderatori i “Big Brother VIP”, njëkohësisht drejtori i Top Albania Radio, Ledion Liço, ka ndarë në emisionin “Goca dhe Gra” emocionet dhe prapaskenat e finales së madhe të këtij edicioni.
Ai u shpreh se finalja është një ndërthurje emocionesh të forta dhe spektakli, ku është e pamundur të mungojë ndjenja pas muajsh të tërë rrëfimesh dhe përjetimesh nga banorët.
Sipas Liços, ky sezon ka qenë ndër më të balancuarit, duke ofruar lojë, tension, histori njerëzore dhe ndjenja të forta, pavarësisht se ishte edicioni i pestë i formatit.
Moderatori kujtoi edhe disa nga momentet më delikate të këtij sezoni, si largimi i Rogertit nga shtëpia apo deklarata e nënës së Selinës, të cilat sipas tij kanë kërkuar menaxhim të kujdesshëm live.
Ndërsa një nga momentet më prekëse për të ka qenë takimi i Malit me të atin, që e cilësoi si shumë të vështirë emocionalisht për t’u trajtuar drejt.
Në fund, Ledion Liço dha edhe lajmin që fansat prisnin: ai konfirmoi se do të jetë sërish në drejtimin e “Big Brother VIP” edhe vitin e ardhshëm.