Mijëra protestues iu bashkuan një mitingu në Paris me Marine Le Pen për të protestuar kundër ndalimit të gjykatës për figurën e ekstremit të djathtë që të marrë pjesë në zgjedhjet e ardhshme presidenciale.
Le Pen, folësja kryesore në tubim, e quajti vendimin një sulm ndaj vullnetit të popullit dhe një luftë për të vërtetën.
“Unë nuk do të dorëzohem”, tha ajo duke këmbëngulur se nderi i saj ishte shkelur.
Të hënën, një gjykatë dënoi Le Pen, partinë e saj dhe zyrtarë të tjerë të partisë për përvetësim të fondeve të BE-së.
Ajo u dënua pjesërisht me kusht dhe u ndalua të kandidojë në zgjedhje për pesë vjet.
Paralelisht me mitingun e RN, dy kundërprotesta u zhvilluan gjithashtu në Paris.
Sipas organizatorëve, rreth 15 000 njerëz u mblodhën në ”Place de la Republique”, pas thirrjes për veprim nga partia e majtë ”La France Insoumise” dhe të Gjelbërit.
Kundërprotestuesit demonstruan kundër rritjes së së djathtës ekstreme dhe kërkuan që të ruhej shteti i së drejtës.
Ndërkohë, mbështetësit e partisë ”Rilindja” të presidentit Emmanuel Macron demonstruan jashtë një takimi të planifikuar të partisë në periferi të kryeqytetit francez.
Udhëheqësi i partisë, Gabriel Attal akuzoi RN për sulme kundër gjyqtarëve dhe institucioneve të Francës.
Le Pen apeloi kundër vendimit, por procedurat mund të zvarriten shumë që ajo të mund të kandidojë në zgjedhjet presidenciale të vitit 2027. Gjykata e Apelit ka njoftuar se do të vendosë më së voni deri në verën e vitit 2026.