Adriatik Lapaj ka reaguar ashpër pas tentativës së Zeqir Kordhonit, dajës së Endri Shabanit, për të marrë mandatin e deputetit në kuadër të koalicionit “Nisma Shqipëria Bëhet”. Në një deklaratë publike, Lapaj shprehu zhgënjimin e thellë ndaj Shabanit, me të cilin bashkëpunoi në zgjedhjet e 11 majit, duke e akuzuar se “doli garant për familjarët e tij, që sot më luftojnë”.
Lapaj thekson se i zgjati dorën për bashkëpunim, por tani është i vendosur: “Zeqiri dhe nipi i tij nuk do marrin asnjë mandat. Jam luftuar nga Rama, Berisha dhe të gjithë ata që i bëra pjesë të rrugëtimit tim. Por nuk do ndalem. Populli do gjykojë”, tha ai.
Ai përmendi një “aleancë të qeverisë, opozitës dhe ‘të rinjve’” që sipas tij po vepron për ta lënë jashtë Kuvendit.
Reagimi i Adriatik Lapajt
Është angazhuar gjithë këneta si e si të mos shkoj unë në Kuvend. Po sa tmerr më keni?! O të mjerë, unë nuk pranoj shantazh e as shitem.
Zeqiri (dajo i Endrit) dhe nipi i tij Endri Shabani të cilit i shtriva dorën e bashkimit nuk do marrin asnjë mandat. Qameti do ndalojnë mua të shkoj në Parlament.
Është një popull i tërë dëshmitar se Endri Shabani u angazhua për hapjen e listave dhe doli garant për familjarët e vetë. Nëse Endri Shabani do të mbahet mend kështu në jetën publike, mbarë u shkoftë bashkë me dajon!
Jam krenar që u luftova nga çdo anë dhe nuk u ndala! U luftova nga Rama, Saliu dhe këta “të rinjtë”, deri dhe te ky që e futa në gji…nga të gjithë.
Ndaj meje dhe krejt ekipit të Lëvizjes Shqipëria Bëhet po konsumohet publikisht PADREJTËSI!
Populli do gjykojë”