Bota akademike shqiptare është në zi pas ndarjes nga jeta të pedagogut dhe studiuesit të njohur të Ekonomisë, Prof. Dr. Fatmir Memaj. Lajmi i trishtë u bë i ditur sot, ndërsa ndarja e tij e papritur ka sjellë dhimbje të thellë në familje dhe në komunitetin universitar.
Në një mesazh ngushëllimi, Universiteti i Tiranës e cilëson humbjen e tij si një goditje të madhe për të gjithë botën akademike: “Prof. Dr. Fatmir Memaj u nda nga jeta në mënyrë të beftë, në kulmin e energjisë intelektuale dhe akademike. Fakulteti i Ekonomisë humbi një koleg të shkëlqyer, një pedagog të përkushtuar dhe një studiues të nivelit ndërkombëtar.”
Fatmir Memaj, 63 vjeç ishte diplomuar në Fakultetin e Ekonomisë në Universitetin e Tiranës në vitin 1985 dhe kishte marrë titullin “PhD” në Ekonomi në vitin 1996. Prej vitit 2007, ai mbante titullin “Profesor” në Departamentin e Statistikës dhe Informatikës së Zbatuar.
Me një karrierë mbi 30-vjeçare në arsimin e lartë, ai ishte autor dhe bashkautor i 6 monografive, 5 përkthimeve librash, rreth 50 artikujve shkencorë dhe afro 90 kumtesave në konferenca, duke lënë pas një trashëgimi të pasur akademike.
Universiteti i Tiranës vlerëson kontributin dhe personalitetin e tij, duke e përshkruar si “një njeri të mrekullueshëm, të urtë dhe me një humor të hollë, që ishte i dashur për këdo që e njihte”.
Ngushëllimet më të ndjera i shkojnë familjes, të afërmve, miqve dhe kolegëve të tij.