Gjykata Kushtetuese e Kosovës ka vendosur se dekreti i Presidentes Vjosa Osmani për shpërndarjen e Kuvendit nuk ka efekt juridik, duke i lënë ligjvënësve një afat prej 34 ditësh për zgjedhjen e presidentit të ri.
Sipas aktgjykimit, nëse brenda këtij afati Kuvendi nuk arrin të zgjedhë presidentin, atëherë ai shpërndahet automatikisht dhe vendi duhet të shkojë në zgjedhje të reja brenda 45 ditësh.
Vendimi erdhi pas kërkesës së dorëzuar nga kryeministri Albin Kurti, i cili kundërshtoi dekretin e 6 marsit të Osmanit për shpërndarjen e Kuvendit pas dështimit për zgjedhjen e presidentit në seancën e 5 marsit.
Kriza nisi pasi në atë seancë nuk u arrit kuorumi, ndërsa përpjekjet për konsensus mes partive nuk dhanë rezultat. Partia në pushtet kishte propozuar kandidatët Glauk Konjufca dhe Fatmire Kollçaku-Mullhaxha, por opozita nuk i mbështeti.
Presidenti i Kosovës zgjidhet me 2/3 e votave në raundet e para ose me 61 vota në raundin e tretë, ndërsa kërkohet prania e të paktën 80 deputetëve për zhvillimin e seancës.
Gjykata kishte pezulluar përkohësisht dekretin deri më 31 mars, ndërsa tani me aktgjykimin përfundimtar ka sqaruar se procedurat kushtetuese për zgjedhjen e presidentit duhet të ndiqen brenda afatit të përcaktuar.
Vendimi i Kushtetueses pritet të ndikojë në zhvillimet politike në vend, duke detyruar partitë të rifillojnë negociatat për arritjen e një marrëveshjeje për zgjedhjen e kreut të shtetit.