“Kur të dalësh nga bunkeri, ngriji sytë drejt qiellit”, ministri izraelit i Mbrojtjes kërcënon hapur Khamenein

Ministri izraelit i Mbrojtjes, Israel Katz, ka lëshuar një paralajmërim të ashpër ndaj Udhëheqësit Suprem të Iranit, Ali Khamenei, duke i thënë publikisht: “Kur të dalësh nga bunkeri, ngriji sytë drejt qiellit dhe dëgjo me kujdes çdo zhurmë”, një referencë e qartë ndaj dronëve dhe raketave izraelite.

Deklarata erdhi në platformën X, si reagim ndaj një grafiku të shpërndarë nga Teherani, ku zyrtarët izraelitë shënjestroheshin si objektiva vrasjeje, mes tyre edhe vetë Katz, të cilin e quanin “Ministri i Terrorizmit”. Ky grafik duket të jetë një version i një modeli izraelit të përdorur më parë për të shënuar eliminimin e zyrtarëve iranianë gjatë konfliktit. Origjina dhe përhapja e tij mbeten ende të paqarta.