Policia e Shkodrës ka bërë një bilanc të gjitha ngjarjeve kriminale që kanë ndodhur përgjatë 24 orëve të fundit.
Si rezultat i veprimeve, në njësinë administrative Kelmend u kapën në flagrancë shtetasit A. R., 35 vjeç, dhe K. R., 42 vjeç, banues në Njësinë Administrative Kastrat, të afërm me njëri-tjetrin. Ata kishin kultivuar 7 parcela me gjithsej 1299 bimë dhe 1000 fidanë të dyshuar narkotikë, të llojit Cannabis Sativa, në afërsi të banesave të tyre. Në zonë u gjet gjithashtu një lidhje e paligjshme e energjisë elektrike. Të dy u arrestuan për veprën penale “Kultivimi i bimëve narkotike”.
Në njësitë administrative Gur i Zi dhe Postribë, policia gjeti dhe asgjësoi 2713 bimë të dyshuara narkotike, ndërsa në njësinë administrative Shllak u asgjësuan 2592 bimë të llojit Cannabis Sativa.
Gjithashtu, në vijim të veprimeve procedurale, Prokuroria nisi procedimin në gjendje të lirë për veprën penale “Shpërdorimi i detyrës” ndaj tre kryetarëve të fshatrave: F. L. (Vilz), R. M. (Ura e Shtrenjtë) dhe R. B. (Domen).
Operacioni “Koordinata” vijon në të gjithë territorin e qarkut Shkodër, me qëllim identifikimin dhe vënien para përgjegjësisë penale të të gjithë autorëve të kultivimit të bimëve narkotike.
Radar.al