Të tjera detaje kanë dalë në pah në lidhje me arrestimin e oficerëve të policisë rrugore.
Kujtojmë se Roven Zeka, Sokol Novaku dhe Edison Tabaku ranë në pranga pasi dyshohen se u korruptuan në lidhje me një aksident.
Euronews ka arritur të zbulojë se SPAK po kryente përgjime në kuadër të një procedimi penal të vitit 2023, kur në rrjetën e transkriptimit të komunikimeve u evidentuan biseda në lidhje me një ryshfet prej 2 mijë eurosh për lehtësimin e pozitës së shtetases Anisa Vrioni, e cila shkaktoi një aksident.
Në dokumentet e dorëzuara në Gjykatën e Posaçme, SPAK nënvizon se bashkëshorti i Anisës, Ergest Vrioni, ka patur komunikim me Edison Tabakun, me të cilin kishte njohje të mëparshme.
Ai ka paguar shumën e parave prej 2 mijë eurosh me qëllim që të mos vënë në pranga bashkëshorten e tij.
Referuar materialeve të dorëzuara në GJKKO, SPAK bën me dije se nga të dhënat e përftuara nga komunikimet telefonike rezulton se Vrioni kërkoi shuma parash tek persona të ndryshëm për t’ia dhënë oficerit të policisë gjyqësore.
Shuma në fjalë u dha pranë banesës së punonjësit të policisë rrugore, në orët e vona të natës, duke shtuar se janë administruar dhe pamje filmike.
Prokuroria e Posaçme nënvizon gjithashtu se nga këqyrja e aparatit të telefonit të personit nën hetim Edison Tabaku, rezulton se ai ka komunikime me shefat e tij eprorë, Sokol Novaku dhe Roven Zeka.
Nga komunikimet që ai ka me personin nën hetim Sokol Novaku, rezulton se i ka bërë me dije atij se personi “ka vetëm një njëshe dhe nëse pret puna deri të nesërmen, se sa ka ardhur nga Ksamili dhe se e ka shok”.
Ai i thotë “ok” dhe se “mos del keq me shefin”, sipas dyshimeve të SPAK.
Në kërkesën e dorëzuar në gjykatë, SPAK konkludoi se të tre oficerët e dyshuar për korrupsion janë transferuar në kryeqytet nga strukturat e policisë Elbasan, ku kanë shërbyer më parë, shkruan euronews.
SPAK thotë se në banesën e OPGJ-së Edison Tabaku u gjetën dhe 2.5 milion lekë dhe 26 mijë euro, ndërsa shefat e tij kanë mohuar dijeninë mbi veprimet e vartësit, duke deklaruar para agjentëve të BKH-së se për rastin janë zbatuar procedurat standarde dhe për shkaktuesen e aksidentit janë referuar materialet në prokurori, duke u hetuar në gjendje të lirë.
E gjtiha ndodhi për fshehjen e një aksidenti të ndodhur më 16 prill, ku për rrjedhojë në spital janë paraqitur 5 persona të lënduar lehtë, të cilët pasi kanë kryer kontrollet e nevojshme janë larguar për në banesë.