Kryeministrja e Ukrainës, Yulia Svyrydenko, ka dhënë zyrtarisht dorëheqjen, pasi Parlamenti ukrainas miratoi largimin e saj në kuadër të një riformatimi qeveritar të iniciuar nga presidenti Volodymyr Zelensky. Me pranimin e dorëheqjes, bie automatikisht edhe i gjithë kabineti qeveritar.
Riformatimi u njoftua të dielën nga Zelensky, i cili deklaroi se ndryshimet janë pjesë e një “strategjie të re politike”, pa dhënë detaje të mëtejshme mbi objektivat e saj. Deri më tani, presidenti nuk ka shpallur emrin e pasuesit të Svyrydenkos.
Pas votimit në Parlament, Svyrydenko falënderoi qytetarët për mbështetjen, duke e cilësuar si një nder shërbimin ndaj Ukrainës.
“Faleminderit të gjithëve për mbështetjen. Ishte një nder të punoja për Ukrainën”, shkroi ajo në rrjetet sociale, duke e shoqëruar mesazhin me një fotografi nga salla e Parlamentit.
Në një deklaratë tjetër, ish-kryeministrja mbrojti bilancin e qeverisë së saj, duke veçuar menaxhimin e krizës energjetike gjatë dimrit të kaluar, pavarësisht dëmeve të shkaktuara nga sulmet ruse ndaj infrastrukturës energjetike, si edhe përparimin në rritjen ekonomike.
Nga ana e tij, Zelensky e falënderoi Svyrydenkon për kontributin e saj dhe bëri të ditur se i ka propozuar të marrë drejtimin e një fushe të re të rëndësishme në marrëdhëniet me një partner kyç të Ukrainës, pa zbuluar detaje të mëtejshme.
Sipas mediave ukrainase, ndër emrat që përfliten për të drejtuar qeverinë janë ministri i Energjisë dhe ish-kryeministri Denys Shmyhal, ministri i Transformimit Digjital Mykhailo Fedorov, kryetari i bashkisë së Kharkivit Ihor Terekhov dhe drejtori i përgjithshëm i kompanisë shtetërore Naftogaz, Serhii Koretsky.