Një gjykatë në Francë ka dënuar me pesë vite burg kryebashkiakun e Saint-Étienne, afër Lionit, Gaël Perdriau, për shantazhimin e një rivali politik përmes një videoje intime.
Sipas Le Figaro, gjykata arriti në përfundimin se 53-vjeçari konservator kishte organizuar filmimin me kamera të fshehtë të zëvendësit të tij, i cili ishte vendosur në kurth në një hotel në Paris në shoqërinë e një punonjësi seksual mashkull. Qëllimi, sipas hetimeve, ishte eliminimi i tij nga skena politike.
Nga pesë vitet e dënimit, një vit është pezulluar, por pavarësisht kësaj, Perdriau duhet të largohet menjëherë nga detyra e kryebashkiakut. Ai ka mohuar vazhdimisht akuzat dhe ka njoftuar se do të apelojë vendimin.
Gjyqtarja Brigitte Verney e përshkroi çështjen si “jashtëzakonisht të rrezikshme për mënyrën se si u organizua dhe u zbatua skema”.
Përveç Perdriau, tre persona të tjerë të përfshirë në planin e shantazhit, i cili ka zgjatur për disa vite, janë dënuar gjithashtu me burg.
Partia konservatore Les Républicains, ku Perdriau mbante detyrën e nënkryetarit në atë kohë, e ka përjashtuar nga radhët e saj, duke e cilësuar veprimin si përdorim të “metodave të neveritshme” kundër një kundërshtari politik.