Parlamenti kroat votoi sot për rikthimin e shërbimit ushtarak të detyrueshëm, një masë që synon të forcojë aftësitë mbrojtëse të vendit në një kontekst të rritur të kërcënimeve globale, raporton Le Figaro.
Kroacia kishte hequr shërbimin e detyrueshëm në vitin 2008, një vit para se të bashkohej me NATO-n, por udhëheqësit kroatë theksuan se situata aktuale gjeopolitike kërkon rivendosjen e trajnimit bazë ushtarak.
Ministri i Mbrojtjes, Ivan Anusiç, deklaroi: “Po përballemi me një rritje të llojeve të ndryshme të kërcënimeve, gjë që kërkon reagim dhe efikasitet nga komuniteti në tërësi. Përballë çdo kërcënimi, mbrojtja e vendit është thelbësore.”
Sipas vendimit të ri, rreth 18,000 të rinj do të thirren çdo vit për një trajnim dy-mujor nga mosha 18 vjeç, duke filluar nga viti 2026. Rekrutët do të marrin deri në 1,100 euro në muaj, ndërsa ata që përfundojnë shërbimin do të kenë avantazh kur aplikojnë për punë në shërbimin civil.