Situata në Rripin e Gazës po përshkallëzohet drejt katastrofës, ndërsa spitalet përballen me mungesë të thellë energjie dhe karburanti. Për shkak të kësaj krize, mjekët janë të detyruar të vendosin disa foshnje së bashku në një inkubator – një praktikë jashtë standardeve mjekësore dhe me rrezik të lartë për jetën.
Sipas Organizatës Botërore të Shëndetësisë (OBSH), mbi 130 foshnje të lindura para kohe janë në rrezik të menjëhershëm, pasi rezervat e karburantit në spitalet e Gazës janë në limitet e fundit dhe mund të zgjasin vetëm edhe për pak orë. Mungesa e energjisë po ndikon rëndë në funksionimin e pajisjeve jetike si inkubatorët, respiratorët dhe sistemet e oksigjenit.
Në spitalin Al-Shifa, një nga më të mëdhenjtë në rajon, mjekët raportojnë për situata ekstreme ku, për të mbajtur foshnjat në jetë, janë të detyruar t’i vendosin disa prej tyre në të njëjtin inkubator. Një foshnjë ka humbur jetën si pasojë e ndërprerjes së energjisë, ndërsa 45 të tjera janë në rrezik të drejtpërdrejtë.
OBSH, UNICEF dhe agjencitë e tjera të OKB-së kanë bërë thirrje urgjente për hapjen e korridoreve humanitare, që do të lejojnë futjen e karburantit, ujit të pijshëm dhe pajisjeve mjekësore në Gaza. Ata paralajmërojnë se nëse ndihma nuk mbërrin menjëherë, numri i viktimave – sidomos në mesin e fëmijëve – do të vazhdojë të rritet.
Bllokada e vazhdueshme e furnizimeve, e vendosur për të ndaluar përdorimin e karburantit nga Hamas, ka shkaktuar pasoja të rënda për popullatën civile, duke lënë më të pambrojturit – foshnjat – në rrezik të vazhdueshëm.