Autoritetet ndërkombëtare për krizën ushqimore njoftuan të premten se qyteti i Gazës është përfshirë nga zia e bukës, një situatë që mund të përhapet në jug, drejt Deir al-Balah dhe Han Junis, nëse nuk arrihet një marrëveshje për armëpushim dhe heqjen e kufizimeve ndaj ndihmave humanitare.
Sipas Klasifikimit të Integruar të Fazave të Sigurisë Ushqimore (IPC), më shumë se gjysmë milioni njerëz në Gazë, rreth një e katërta e popullsisë, përballen me urinë katastrofike, duke rrezikuar jetën, sidomos fëmijët. Raporti thekson se uria është shkaktuar nga luftimet, bllokimi i ndihmave, shpërnguljet masive dhe dështimi i prodhimit ushqimor pas 22 muajsh konflikti.
Izraeli hodhi poshtë raportin, me kryeministrin Benjamin Netanyahu që e quajti “gënjeshtër të hapur” dhe Ministria e Jashtme që nënvizoi se mbi 100.000 kamionë me ndihma kishin hyrë në Gazë që nga nisja e luftës.
Ekspertët ndërkombëtarë, megjithatë, paralajmërojnë se uria në Gaza po përdoret si armë dhe se përshkallëzimi i luftës do të rëndojë më tej krizën humanitare.
Ky është hera e parë që IPC-ja konfirmon zyrtarisht zi buke në Lindjen e Mesme, një iniciativë që përfshin 21 organizata humanitare dhe agjenci të OKB-së, e mbështetur nga Bashkimi Evropian, Gjermania, Britania dhe Kanadaja.
Qeveria izraelite dhe Hamas vazhdojnë të fajësojnë njëri-tjetrin për përkeqësimin e krizës, ndërsa SHBA, Katari dhe Egjipti po përpiqen të ndërmjetësojnë për një armëpushim dhe për lehtësimin e ndihmave humanitare.