Një ngjarje tronditëse ka ndodhur në landin e Baden-Württemberg në Gjermani, ku një 37-vjeçar kreu një krim të dyfishtë e më pas i dha fund jetës së tij dhe foshnjës së vet. Sipas mediave lokale, gjithçka nisi të dielën në mbrëmje, pas një konflikti të ashpër në banesën familjare në Waldachtal. Gjatë sherrit, burri vrau bashkëshorten e tij 34-vjeçare duke përdorur një objekt të mprehtë, identiteti i së cilës nuk është bërë publik. Policia ende nuk ka saktësuar se çfarë arme është përdorur.
Pas vrasjes, ai mori foshnjën e tyre vetëm 3 muajshe dhe u largua me makinë. Disa kilometra më tej, në zonën e Pfalzgrafenweiler, ai futi makinën me shpejtësi në korsinë e kundërt dhe u përplas frontal me një automjet të drejtuar nga një grua 29-vjeçare, në të cilin ndodhej edhe fëmija i saj 22-muajsh. Përplasja ishte fatale për 37-vjeçarin dhe foshnjën, ndërsa nëna dhe fëmija tjetër mbetën të plagosur rëndë, por janë jashtë rrezikut për jetën.
Pas aksidentit, policia bllokoi rrugën për disa orë, ndërsa ekspertët mjeko-ligjorë u thirrën për të përcaktuar saktësisht rrethanat e ngjarjes. Departamenti i Hetimit Penal ka hapur një dosje të dyfishtë hetimore për vrasjen dhe aksidentin, duke e cilësuar rastin si një nga më të rëndët e viteve të fundit në zonë.