Një konferencë rajonale e mbajtur javën e kaluar në Tiranë është përfshirë në një situatë të tensionuar diplomatike, pasi Kosova u përfaqësua me fusnotë që i referohej Rezolutës 1244 të OKB-së, ndryshe nga shtetet e tjera pjesëmarrëse.
Si reagim, zëvendësministri në detyrë i Financave të Kosovës, Agon Doburuna, braktisi konferencën dhe refuzoi të nënshkruajë Deklaratën e Angazhimit, duke e cilësuar përfaqësimin si “të papranueshëm për një shtet sovran”.
“Mënyra si u trajtua përfaqësimi i Kosovës ishte thellësisht zhgënjyese dhe e papranueshme për një shtet sovran, që kontribuon në mënyrë aktive dhe të barabartë në këto procese,” shkroi Doburuna.
“Kosova është një realitet i pamohueshëm ndërkombëtar. Ne jemi të përkushtuar thellësisht për të garantuar të drejtat e fëmijëve tanë dhe për të kontribuar në paqe e stabilitet në rajon, por kjo nuk mund të bëhet duke na mohuar subjektivitetin shtetëror,” theksoi Doburuna në reagimin e tij publik.
Dobruna deklaroi se kërkesa për korrigjim u injorua nga Ministria shqiptare e Shëndetësisë, organizatore e aktivitetit, duke cenuar frymën e bashkëpunimit rajonal. Në konferencë ishte i pranishëm edhe kryeministri Edi Rama.
Kosova dhe Serbia kishin arritur në vitin 2012 një marrëveshje për përfaqësimin me fusnotë, por përdorimi i saj në këtë rast është parë si një hap prapa për subjektivitetin shtetëror të Kosovës.
Në bazë të kësaj marrëveshjeje, fusnota do t’i shtohej emrit të Kosovës sa herë që vendi do të përmendej, për ta mundësuar përfaqësimin në konferenca e iniciativa të ndryshme rajonale e ndërkombëtare.