Juristi dhe konstitucionalisti Sokol Hazizaj ka reaguar pas vendimit të Gjykatës së Posaçme (GJKKO) për pezullimin nga detyra të zëvendëskryeministres Belinda Balluku. Reagimi i tij vjen në të njëjtën ditë kur Gjykata Kushtetuese njoftoi se ka pranuar për shqyrtim kërkesën e kryeministrit Edi Rama, i cili kërkon rrëzimin e këtij vendimi.
Në një postim publik, Hazizaj rendit disa nene të Kushtetutës dhe Kodit të Procedurës Penale, duke argumentuar se masa e pezullimit nuk mund të aplikohet ndaj një anëtari të Këshillit të Ministrave.
Ai kujton se Neni 73, pika 2 e Kushtetutës përcakton se një deputet nuk mund të arrestohet apo t’i hiqet liria pa autorizimin e Kuvendit, ndërsa Neni 103, pika 3 saktëson se ministrat gëzojnë të njëjtin imunitet si deputetët.
Hazizaj citon edhe Nenin 242 të Kodit të Procedurës Penale, ku thuhet se masa e pezullimit nga detyra “nuk zbatohet ndaj personave të zgjedhur sipas ligjit elektoral”, si dhe Nenin 228 mbi kushtet e vendosjes së masave të sigurimit personal.
Sipas juristit, vendimi i GJKKO-së për pezullimin e Ballukut është në kundërshtim me këto dispozita. Ai ironizon situatën duke shtuar se tashmë mbetet për t’u parë nëse Gjykata Kushtetuese do të japë zgjidhje: “Çfarë i ngelet të shoh Gjykata Kushtetuese, se po na lodh. I ka thënë të gjitha Kushtetuta e Republikës së Shqipërisë. Kaq e thjeshtë.”
POSTIMI I HAZIZAJT
Neni 73/2 i Kushtetutës citon se, “Deputeti nuk mund të arrestohet ose t’i hiqet liria në çfarëdo lloj forme apo ndaj tij të ushtrohet kontroll personal ose i banesës, pa autorizimin e Kuvendit” Neni 103/3 citon se, “Anëtarët e Këshillit të Ministrave gëzojnë imunitetin e deputetit”. Neni 242 i Kodit të Procedurës Penale citon Pezullimin e ushtrimit të një detyre a sherbimi publik. “1. Me vendimin qe disponon pezullimin e ushtrimit të një detyre a sherbimi publik, giykata i ndalon perkohësisht tê pandehurit, plotësisht ose pjesërisht, veprimtarinë që lidhet me to. 2. Kjo masë nuk zbatohet ndaj personave të zgjedhur sipas ligjit elektoral”. Neni 228/3 i Kodit të Procedurës Penale citon Kushtet per caktimin e masave te sigurimit personal…… midis të tjerave pranon “Masat e sigurimit personal vendosen….” Gj.k.k.o ka pezulluar nje shtetas nga puna qe ben, me kërkes të prokurorit. Çfarë i ngelet të shoh Gjykata Kushtetuese, se po na lodh! I ka thënë të gjitha Kushtetuta e R.Sh. Kaq e thjeshtë.