Kryeministri Edi Rama, gjatë një takimi me gratë dhe vajzat e qarkut Gjirokastër, foli për transformimin që po përjeton Shqipëria, veçanërisht në fushën e turizmit. Ai solli si shembull qytetin e Gjirokastrës, ku, sipas tij, pazari është i mbushur me turistë edhe në ditë jave, ndryshe nga e kaluara kur mezi gjeje 2-3 dyer të hapura për akomodim.
Duke theksuar ndryshimet pozitive në jug të vendit, Rama ndau një batutë me kandidatin për deputet, Tërmet Peçin. “Më tha njëherë Tërmeti: ‘Komandat, s’e kishim imagjinuar ndonjëherë të shihnim bionde suedeze duke bërë xhiro në Tepelenë’. Bjonde, sy bojëqielli, që shëtisin deri në Memaliaj”, tha Rama.
Ai shtoi se kjo është pamja e Shqipërisë reale, që po ndryshon çdo ditë, pavarësisht se ka ende njerëz që nuk duan ose nuk arrijnë ta shohin këtë zhvillim.
Rama u shpreh gjithashtu krenar për pjesëmarrjen e grave dhe vajzave në jetën politike, duke theksuar se Partia Socialiste ka arritur përfaqësimin e tyre në 40% dhe synon barazinë e plotë në të ardhmen.