Ministrja e Brendshme, Albana Koçiu, iu përgjigj sot pyetjeve të deputetëve në Komisionin për Çështjet e Brendshme dhe të Mbrojtjes lidhur me ndalimin e përkohshëm të monopatinave, një masë që ka shkaktuar debat publik në muajt e fundit.
Koçiu u shpreh se arsyeja kryesore për ndërhyrjen e menjëhershme lidhet me rrezikshmërinë e lartë të këtyre mjeteve motorike. “Jo që nuk ka një legjislacion për bllokimin e monopatinave, por ato janë mjete motorike të parregulluara, që nuk kanë shpejtësi të normuar dhe që qarkullojnë në rrugë pa respektuar standardet e sigurisë. Ka sot monopatina që arrijnë deri në 80 km/orë, përdoren nga fëmijë pa asnjë masë mbrojtëse dhe kjo krijon situata tepër të rrezikshme”, theksoi ministrja.
Ajo shtoi se masat e marra nuk janë ekskluzivisht shqiptare, por pasqyrojnë praktikat e vendeve të tjera evropiane si Italia, Franca dhe Maqedonia e Veriut, të cilat gjithashtu kanë pezulluar përkohësisht përdorimin e monopatinave deri në hartimin e një legjislacioni të plotë dhe të standardizuar.
“Prioriteti ynë është ruajtja dhe mbrojtja e jetës së qytetarëve, sidomos e fëmijëve. Nuk mund të lejojmë që përdoruesit të rrezikohen nga mjete motorike të parregulluara, pavarësisht se këto mjete lehtësojnë lëvizshmërinë dhe kontribuojnë në mjedis të pastër”, tha Koçiu.
Ministrja bëri të ditur se po punohet intensivisht për rregullimet ligjore që do të vendosin parametrat e qartë të përdorimit të monopatinave, duke përfshirë kufizimin e shpejtësisë, përdorimin e mjeteve mbrojtëse dhe normimin e funksioneve të tyre. Rregullat do të paraqiten së shpejti në Kuvend për miratim.
Sipas statistikave të Policisë së Shtetit, që nga fillimi i vitit janë regjistruar mbi 1 mijë aksidente me monopatina, duke bërë të qartë se përdorimi i tyre pa rregulla të qarta është një rrezik i madh për qytetarët. Koçiu nënvizoi se masat e ndërmarra janë të përkohshme dhe kanë për qëllim krijimin e një baze ligjore të sigurt dhe të standardizuar për të gjithë përdoruesit e këtyre mjeteve.
“Referuar shifrave të Policisë së Shtetit, janë mbi 1 mijë aksidente të ndodhura nga fillimi i këtij viti. Në fakt, dhe po t’i referohesh të dhënave, jo në të gjitha rastet Policia e Shtetit njoftohet për këto aksidente. Vetëm kur është njoftuar Policia, janë 1 mijë raste, nuk janë pak. Patjetër, që monopatinat janë një rrezikshmëri e madhe për të gjithë qytetarët, kështu që patjetër ne ndërhymë edhe në këtë pikë, duke i pezulluar përkohësisht dhe duke na dhënë mundësinë që ne ndërkohë të ndërtojmë një bazë ligjore ku të qartësohet dhe të standardizohet mënyra se si këto mjete motorike duhet të lëvizin dhe të qarkullojnë, duke patur parasysh edhe të gjitha standardet e sigurisë që do duhet të respektohen”, tha ministrja.