Në Kolegjin Zgjedhor u shqyrtua sot kërkesa e demokrates Andia Ulliri për marrjen e mandatit të deputetit në qarkun e Durrësit.
Ulliri kishte kërkuar rrëzimin e vendimit të KQZ-së, e cila i dha mandatin ish-prokurorit Arjan Ndoja. Ajo u përfaqësua nga avokati Indrit Sefa, ndërsa Ndoja nuk ishte i pranishëm, por përfaqësohej nga avokati Rexhë Margjeka.
Që në fillim të seancës, avokati i Ndojës kërkoi që Ulliri të mos njihej si palë legjitime ankimuese. Pas dëgjimit të palëve, trupi gjykues vendosi pushimin e çështjes, duke argumentuar se Andia Ulliri nuk legjitimohet si palë paditëse për t’iu drejtuar Kolegjit Zgjedhor.
Pas vendimit, avokati Sefa e cilësoi vendimin si një “justifikim absurd”.
Kandidatja demokrate ka kërkuar mandatin e deputetit duke argumentuar se ai i takon asaj për shkak të kuotës gjinore. Megjithatë, më herët kërkesat e saj janë rrëzuar si nga Komisioni i Ankimimeve dhe Sanksioneve (KAS), ashtu edhe nga kryekomisioneri Celibashi, me argumentin se lista e hapur dhe lista e mbyllur funksionojnë të ndara.
Kujtojmë Andia Ulliri kandidoi në listat e Partisë Demokratike – Aleanca për Shqipërinë Madhështore në zgjedhjet e fundit parlamentare.